I 2009 var det ca 180 gardsbruk i drift i Surnadal, av desse hadde 152 husdyr. I tillegg kjem areal i drift som leigejord. Næringa skaper ca 230 årsverk direkte i landbruksproduksjonen, og bidrar med stor årlig verdiskaping med utgangspunkt i råvarer produsert lokalt. Landbruket i Surnadal omset mat for ca 110 mill. i året. Samla omsetning for mjølkebruka inkl. kjøtt­produksjon i Surnadal er 80 mill. kr. (basert på tal frå NILF). I 2007 vart det produsert 9,8 mill. liter mjølk frå 80 mjølkebruk, mot 113 mjølkebruk i 1999. Dette tilsvarar forbruket av drikkemjølk, ost og andre meieriprodukt til 32.000 personar i eit år. 8% av sysselsettinga i Surnadal er direkte i landbruket. I tillegg skapar kvart årsverk ein til to arbeidsplassar i andre næringar, som veterinær, handverkarar, rådgjevarar, handelsnæring osb.

Tenestetilbodet

Surnadal kommune har prioritert å oppretthalde eit godt tenestetilbod retta mot jordbruks­næringa, nettopp fordi det gjev store positive ringverknader til lokalsamfunnet. Avdeling for Næring og utvikling arbeider på eit bredt felt, med mange ulike saker. Ei av dei største oppgåvene er å sørgje for at ca 40 mill. kroner i produksjonstilskot i jordbruket kjem hit til kommunen. Mykje av desse midla blir nytta lokalt.

Elles arbeider vi mykje med tilrettelegging av ulike ordningar som refusjon av sjukdoms­avløysing, miljøtiltak, diverse erstatningsordningar osb. Administrasjonen arbeider og mykje med saksbehandling, forvaltning av midlar via Innovasjon Norge til bedriftsutvikling, nybygg, etablerarstipend osb. Rådgjeving på ulike område er og ei prioritert oppgåve. Sakshand­saming til formannskap og kommunestyre er og ei tidkrevjande oppgåve, dette er ofte saker knytt til jordlov, konsesjonslov, odelslov osb.

Det er viktig for oss å informere godt om dei moglegheitene som finst for brukarane, slik at ein og i framtida vil oppleve rekruttering, utvikling og ny næringsverksemd på gardsbruka i Surnadal.